Вас, святыя мученицы, Веро, Надеждо и Любы, славим, величаем и ублажаем, купно с мудрою материю Софиею, ейже покланяемся, яко образ богомудраго попечения являющей. Умоли, святая Веро, Творца видимых и невидимых, да веру крепку, неблазненну ^[1] и нерушиму подаст нам. Ходатайствуй, святая Надеждо, пред Господом Иисусом за нас грешных, да упование на благая Своя не отженет от нас, и от всякия скорби и нужды да избавит ны. Исповеждь, святая Любы, Духу истины, Утешителю, напасти и печали наша, да Той свыше сладость небесную ниспослет душам нашим. Помозите убо в бедах наших, святыя мученицы, и купно с мудрою материю вашею Софиею, молите Господа Бога, да сохранит под покровом Своим Церковь Свою Святую. Такожде и о всех нас вашего теплаго предстательства пред Богом усердно молим, да купно с вами и со всеми святыми превознесем и препрославим пресвятое и великое имя Отца и Сына и Святаго Духа, Бога, предвечнаго Владыки и благих Содетеля, ныне и присно и во веки веков. Аминь.

Тропарь мученицам Вере, Надежде, Любови и матери их Софии, глас 4-й:

Торжествует Церковь первородных, и свеселится приемля матерь о чадех веселящуюся, яже яко мудрости тезоименитая тройственным богословским добродетелем равночисленныя породи. Тыя с мудрыми девами зрит уневестившияся Жениху Богу Слову, с нею и мы духовно в памяти их свеселимся, глаголюще: Троицы поборницы, Веро, Любве и Надеждо, в вере, любви и надежде утверждайте нас.

Кондак, глас 1-й:

Софии честныя священнейшия ветви, Вера и Надежда и Любовь, показавшеся, мудрость обуиша еллинскую благодатию, и пострадавше, и победоносицы явившеся, венцем нетленным от всех Владыки Христа увязошася.

Примечания:

[1] Чистую, неоскверненную

Святые мученицы Вера, Надежда, Любовь и матерь их София
Святейший Патриарх Московский и всея Руси Пимен (Извеков). Вера, Надежда, Любовь
Молитва об укрощении страстей (святителя Тихона Задонского)
Молитва святому апостолу и евангелисту Иоанну Богослову
Молитва преподобномученику Корнилию, игумену Псково-Печерскому, чудотворцу
Молитва преподобному Иринарху, затворнику Ростовскому
Молитвы святому праведному воину Феодору (Ушакову), Санаксарскому