Молитва святому праведному воину Феодору

О преславный защитниче земли Русския и веры православныя усердный поборниче, непобедиме воине Феодоре! Никая благодарственная словеса, ниже изящная витийства довлеют, во еже прославити праведное и дивное твое житие, понеже измлада крепкую веру во Христа и любовь ко Отечеству стяжав, благоплодное прозябение честных родителей явился еси. Сего бо ради, Божию дару тезоименит, стране своей в скорбная времена браней противу иноплеменных показался еси. Ибо, праведным воеводам подражая, не числом и умением токмо, но паче верою враги побеждал еси, силу благочестия истиннаго показуя. Темже любовию к тебе распаляеми, воспеваем многия добродетели твоя: велию любовь ко Господу и ближним, зане тех ради живот полагал еси; чистоту ангелоподобную, яко вся воздержанием удивил еси; нестяжание истинное, ибо благая и красная мира сего презрел еси. Ей, преблаженне Феодоре, угодниче Божий и благоверный болярине царей православных, призри на убогое моление наше, из греховного плена к тебе возносимое. Приклони на милость Господа нашего Иисуса Христа, да не воздаст по делом нашим, но обаче дарует грехов оставление, избавит от злых, находящих на ны; и подаст властем нашим о народе усердное попечение, воинству мужество в ратех, народу благочестие трезвенное. И сподобит нас достигнути безмятежнаго пристанища во Царствии Небеснем, идеже со всеми святыми прославляти будем всесвятое имя Отца и Сына и Святаго Духа во веки веков. Аминь.

Молитва иная:

Приникни, праведне воине Феодоре, с горних селений на притекающих к тебе, и вонми молению их: умоли Господа Бога даровати всем нам еже ко спасению нашему мы просим от Него, при святем твоем предстателъстве. Ты великое, возложенное на тя служение тщательно проходил еси, и нас твоею помощию пребывати коегождо, в неже призван есть, настави. Ты, победив супостатов множества, и на нас ополчающихся всех видимых и невидимых врагов низложи. Умоли Господа Бога даровати крепкий и ненарушимый мир и земли плодоносие, пастырем святыню, законом правду и силу, военачальником мудрость и доблесть непобедимую, градоначальником суд, флоту твоему Российскому и всему воинству нашему преданность вере и Отечеству и неодолимое мужество, всем же православным христианом здравие и благочестие. Сохраняй страну нашу Российскую и обитель сию святую от всех наветов вражиих, да словом и делом прославляется в них всесвятое имя Отца и Сына и Святаго Духа, ныне и присно, и во веки веков. Аминь.

Текст приводится по изданию: Святой праведный воин Феодор Ушаков, адмирал флота Российского, Непобедимый. Житие, служба. Рождество-Богородичный Санаксарский монастырь, 2004. С. 62-64.

Молитва об укрощении страстей (святителя Тихона Задонского)
Молитва на поселение в новом доме (с переводом на русский язык)
Молитва ко Пресвятой Богородице (из Акафиста Покрову Пресвятой Богородицы)
Молитва пред входом в церковь (с переводом на русский язык)
Молитва святым семи отрокам Ефесским

Copyright © 2006-2011 Библиотека "Халкидон"
При использовании материалов сайта ссылка на halkidon2006.orthodoxy.ru обязательна.