Кондак 1

Избранный архиерею Христов премудрый, яко молитвенника тепла чтуще тя, благодарственная восписуем о тебе Господу, но яко Свету присносущну предстояй, и нас узрети сей сподоби, да зовем ти: радуйся, святителю Филарете, Церкве русския похвало и утверждение.

Икос 1

Ангелом предстателем Церкве Русския показался еси еще в земнем житии твоем, наипаче же ныне, ликом небесным совокуплен, молишися за ны, похваляющия тя и зовущия:

Радуйся, святителей Московских сопрестольниче;

радуйся, во благодати им наследниче.

Радуйся, яко Петр Москву возлюбивый;

радуйся, яко Алексий за ню моливый.

Радуйся, яко Иона град наш хранивый;

радуйся, яко Филипп лесть возненавидевый.

Радуйся, Иовлю благочестию подражавый;

радуйся, Ермогеновою любовию пылавый.

Радуйся, святителю Филарете, Церкве Русския похвало и утверждение.

Кондак 2

Видяще благодати Божия на тя излияние преизобильное, дивимся: сие бо немощи человечестей неудобоприятельно является, обаче Господа славяще, с веселием взываем: Аллилуия.

Икос 2

Недоразумеваемая премудрости Божия разумети ища, бдения и пощения к учению книжному премудро приложил еси, темже зовем ти:

Радуйся, от века Господом избранный;

радуйся, от пелен Его возлюбивый.

Радуйся, от юности Его взыскавый;

радуйся, до конца Его потерпевый.

Радуйся, во дни Ему трудивыйся;

радуйся и в нощи Его моливый.

Радуйся, выну пред Ним ходивый;

радуйся, в сердце Его носивый.

Радуйся, святителю Филарете, Церкве Русския похвало и утверждение.

Кондак 3

Сила Вышняго умножи боголюбие твое, егда вступил еси во иноческий чин и яко нива угобженная, явился еси всем, хотящим жати спасение, внегда пети сице: Аллилуия.

Икос 3

Имея разум богоприятный, востекл еси к познанию истины Христовы, мы же словесами твоими утвердившеся в сей, похвалы яко кадило умное приносим ти, взывая сице:

Радуйся, Книгу Бытия нам отверзый;

радуйся, богословия вертоград насадивый.

Радуйся, Богом Словом вразумленный;

радуйся, веру нелестно изъяснивый.

Радуйся, глад Слова Божия утоливый;

радуйся, за сие скорби понесый.

Радуйся, сокровища своя на небеси сокрывый;

радуйся, нищету духовную обретый.

Радуйся, святителю Филарете, Церкве Русския похвало и утверждение.

Кондак 4

Бурю внутрь имея помышлений сомнительных, пиита славный, благодатным глаголом твоим вразумлен быв, Богови воззва: Аллилуия.

Икос 4

Слышавше пастыри Христовы славимое по всей России имя твое, к тебе яко к наставнику своему притекаху и, премудрости, в тебе сущей, дивящеся, вопияху сице:

Радуйся, священства пастырю;

радуйся, монашества пестуне.

Радуйся, благочестия ревнителю;

радуйся, уставов исправителю.

Радуйся, лукавых обличителю;

радуйся, безстудств искоренителю.

Радуйся, в добрых поспешниче;

радуйся, во благих помощниче.

Радуйся, святителю Филарете, Церкве Русския похвало и утверждение.

Кондак 5

Боготечною звездою по тверди церковней в житии твоем шествовал еси, яко светильник путеводительный, всем ищущим поклонитися Христу и воспети Ему: Аллилуия.

Икос 5

Видяще людие московстии твое усердное о них промышление, аще и в тайне благая творити подвизался еси, возблагодариша Господа, тебе же с любовию взываша:

Радуйся, Коломны малыя прозябение;

радуйся, Лавры Сергиевы благовонный крине.

Радуйся, града Петрова светильниче преизящный;

радуйся, Твери древния украшение.

Радуйся, Ярославля величание;

радуйся, первопрестольныя Москвы славо.

Радуйся, Руси ликование;

радуйся, всех верных веселие.

Радуйся, святителю Филарете, Церкве Русския похвало и утверждение.

Кондак 6

Проповедника богоносна свемы тя вси, жезлом истины от стада Христова отгнавша волков буесловия, не ведущих пети: Аллилуия.

Икос 6

Возсиявый мирови, яко свеща богомыслия, от лампады преподобнаго Сергия возжженная, и ныне в сени смертней седящия просвети, да зовем ти:

Радуйся, млеком монашества вскормленный;

радуйся, горечи мира никакоже вкусивый.

Радуйся, преподобнаго Сергия возлюбивый;

радуйся, подвигом его поревновавый.

Радуйся, посещением его утешенный;

радуйся, в обители его погребенный.

Радуйся, поругание с ним приявый;

радуйся, паки с ним воспрославленный.

Радуйся, святителю Филарете, Церкве русския похвало и утверждение.

Кондак 7

Хотящу ти от нынешняго века преставитися прелестнаго, почтиша тя празднеством Церковь и людие русския, ты же на вся похвалы едино отвеща: Аллилуия.

Икос 7

Нова показа тя скитов и обителей зиждителя Зиждитель Церкви нам, от Него бывшим, да с преподобным сонмом вопием ти:

Радуйся, во смирении рожденный;

радуйся, похвалами не уязвленный.

Радуйся, клеветами не обойденный;

радуйся, скорбями осоленный.

Радуйся, подвигом добрым подвизавыйся;

радуйся, добре от всех его сокрывый.

Радуйся, смирением возвысивыйся;

радуйся, терпением спасавыйся.

Радуйся, святителю Филарете, Церкве Русския похвало и утверждение.

Кондак 8

Странствие земное свершая, устранился еси суетнаго мира, ум на небеса преложив и с горними лики Творцу воспевая: Аллилуия.

Икос 8

Весь бе в вышних, но и нижних никакоже отступи, всякое дело в разсуждении блага церковна творя, темже зовем ти:

Радуйся, архиерейства не искавый;

радуйся, крест его смиренно понесый.

Радуйся, на вечерю велию званный;

радуйся, со избранными возлегий.

Радуйся, архитектоне Божий премудрый;

радуйся, архитриклине Христов предобрый.

Радуйся, Ангелов соликовниче;

радуйся, святых сотаинниче.

Радуйся, святителю Филарете, Церкве Русския похвало и утверждение.

Кондак 9

Всякое естество человеческое и ангельское удивися множеству содеянных тобою благих, како немощь телесную духом препобеждал еси, Богови зовя: Аллилуия.

Икос 9

Ветия многовещанныя, яко рыбы безсловесныя немотствуют, уязвленныя стрелою любомудрия твоего, емуже дивящеся, верно вопием:

Радуйся, философе богомудрый;

радуйся, риторе преизящный.

Радуйся, проповедниче златоустый;

радуйся, диалектиче преострый.

Радуйся, заблудших исправление;

радуйся, безбожных отрезвление.

Радуйся, буемудрых посрамление;

радуйся, боголюбцев услаждение.

Радуйся, святителю Филарете, Церкве Русския похвало и утверждение.

Кондак 10

Спасти хотя мир, Иже всех Украситель, украси святыми Церковь Свою, да возжадавше благодати, им дарованныя, вземлем с веселием крест свой, поюще: Аллилуия.

Икос 10

Стена был еси, сый жив, всем ищущим крепкаго заступления твоего, обаче и по смерти, яко пастырь добрый, стадо твое не оставляеши, мы же зовем ти:

Радуйся, благодати исполненный;

радуйся, чудесами прославленный.

Радуйся, недуги исцеляяй;

радуйся, бесы изгоняяй.

Радуйся, в видения восходивый;

радуйся, грядущая познавый.

Радуйся, за царство земное моливый;

радуйся, Царства небеснаго взыскавый.

Радуйся, святителю Филарете, Церкве Русския похвало и утверждение.

Кондак 11

Пение всякое побеждается исчислити тщащееся тобою свершенная, обаче достойно и праведно есть воспети прославльшему тя Господу: Аллилуия.

Икос 11

Яко светоприемное зерцало Солнца Умнаго, не образ мира сего, обаче зраки горних вещей начертал еси в сердце своем, к разуму Божественному наставляя зовущия ти:

Радуйся, под иго Христово выю приклонивый;

радуйся, бремя Его кротко понесый.

Радуйся, на Голгофу верно восходивый;

радуйся, и Фавор тем обретый.

Радуйся, любовию Христовою осиянный;

радуйся, токи ея мир напоивый.

Радуйся, хлебом богомыслия тысящи насытивый;

радуйся, православия столпе богозданный.

Радуйся, святителю Филарете, Церкве Русския похвало и утверждение.

Кондак 12

Благодать воздати восхотев блудным чадом, наследство отчее расточившим, прослави тя всемилостивый Господь, яко сосуд, благодати исполненный, да паки благодарственно воспоем Ему: Аллилуия.

Икос 12

Поюще честное успение твое, славим сладчайшаго Господа Иисуса, Емуже нелестно поработал еси в житии твоем, похваляем Пречистую Его Матерь, Яже есть нам в скорбех и печалех утешение, тебе же с веселием взываем:

Радуйся, кончину свою от Господа предузнавый;

радуйся, в день сея Таин Его вкусивый.

Радуйся, истее ныне Сих причащаяйся;

радуйся, от источника животна испивый.

Радуйся, грешными оплаканный;

радуйся, святыми целованный.

Радуйся, в дольних воспетый;

радуйся, в горних обрадованный.

Радуйся, святителю Филарете, Церкве Русския похвало и утверждение.

Кондак 13

О премудрый святителю Христов Филарете, малое сие прием приношение, умоли за ны Господа славы и Всепетую Матерь Его, да не устрашимся восхождения крестнаго, обаче единем сердцем ведомому Богу воспоем: Аллилуия.

Сей кондак глаголется трижды, затем икос 1 и кондак 1.

Молитва ко святителю Филарету, митрополиту Московскому и Коломенскому, чудотворцу

О преславный святителю Христов Филарете, любомудрия главо, богословия светильниче, сада духовнаго вертоградарю добрый, иночества пестуне, священства пастырю, алчущих питателю, отпадших воззвание, верных похвало; иже при триех царех земных Царю Небесному, в Троице славимому и поклоняемому, послуживый; иже и в чертозех земных выну пред Ним ходивый; иже, преклонився пред волею Божиею, к послушанию молитв твоих Господа приклонивый; иже нищетою духовною паче злата и камения ризы души своея украсивый; молим тя днесь, ни добродетелей твоих, ниже любве твоея к ним имуще: во дни сия лукавыя, путем широким в ров погибельный ны влекущия, буди нам вожатай добрый ко вратом тесным, испроси у Создателя всяческих коемуждо во благая совершенный дар и вся ны во страсе Божии добре соблюди; да помянутся пред Господем слезы твоя, яже за Россию пролиял еси, и да вменятся во оправдание нам, жестокосердия ради слез лишенным, да животворят ны глаголи твои благодатнии, да просветит и ны свет Христов. Егда же приидет и наш час исповедати веру свою пред человеки, укрепи ны молитвами твоими, да точию греха убоимся, точию Господеви послужим, да сподобимся и мы самозрачне видети чертоги небесныя и с тобою и всеми святыми славити и воспевати пречестное и великолепое имя Отца, и Сына, и Святаго Духа в безконечныя веки. Аминь.

Текст приводится по изданию: Акафист и молитва святителю Филарету Московскому (для келейного чтения) // Святитель Филарет (Дроздов). Избранные творения. Акафист. М.: Паломникъ, 2003. С. 305-316.

А. И. Яковлев. Светоч Русской Церкви (о святителе Филарете Московском)
Ежедневная молитва святителя Филарета, Митрополита Московского

Copyright © 2006-2011 Библиотека "Халкидон"
При использовании материалов сайта ссылка на halkidon2006.orthodoxy.ru обязательна.