Часы Святой Пасхи [Библиотека "Халкидон"]

Библиотека “Халкидон”

___________________

Часы Святой Пасхи

Сошествие во ад Господа нашего Иисуса Христа

Христос воскресе из мертвых, смертию смерть поправ и сущим во гробех живот даровав. (Трижды.)

Воскресение Христово видевше, поклонимся Святому Господу Иисусу, Единому Безгрешному. Кресту Твоему покланяемся, Христе, и святое Воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите, вси вернии, поклонимся святому Христову Воскресению: се бо прииде Крестом радость всему миру. Всегда благословяще Господа, поем Воскресение Его: распятие бо претерпев, смертию смерть разруши. (Трижды.)

Предварившия утро яже о Марии и обретшия камень отвален от гроба, слышаху от Ангела: во свете присносущнем Сущаго с мертвыми что ищете яко человека? Видите гробныя пелены, тецыте и миру проповедите, яко воста Господь, умертвивый смерть, яко есть Сын Бога, спасающаго род человеческий.

Аще и во гроб снизшел еси, Безсмертне, но адову разрушил еси силу, и воскресл еси яко Победитель, Христе Боже, женам мироносицам вещавый: радуйтеся! и Твоим апостолом мир даруяй, падшим подаяй воскресение.

Во гробе плотски, во аде же с душею, яко Бог, в раи же с разбойником, и на престоле был еси, Христе, со Отцем и Духом, вся исполняяй, Неописанный.

Слава Отцу и Сыну и Святому Духу.

Яко Живоносец, яко рая краснейший, воистинну и чертога всякаго царскаго показася светлейший, Христе, гроб Твой, источник нашего воскресения.

И ныне и присно и во веки веков. Аминь.

Вышняго освященное Божественное селение, радуйся! Тобою бо дадеся радость, Богородице, зовущим: благословенна Ты в женах еси, Всенепорочная Владычице.

Господи, помилуй. (40 раз.)

Слава Отцу и Сыну и Святому Духу, и ныне и присно и во веки веков. Аминь.

Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Христос воскресе из мертвых, смертию смерть поправ и сущим во гробех живот даровав. (Трижды.)

Текст приводится по изданию: Часы пасхальные // Православный молитвослов. М.: Трифонов печенгский монастырь, "Новая книга", "Ковчег", 2002. С. 103-107.

Рекомендуем также:

Пасха Христова
Стихиры Святой Пасхи
Святитель Иоанн Златоуст. Слово огласительное на Святую Пасху (по церк.-слав. и по-русски)
Молитва Воскресшему Спасителю
Святитель Григорий Нисский. Слово на Святую и спасительную Пасху
Святитель Филарет (Дроздов), Митрополит Московский. Слово в день Святой Пасхи (1825 год)
Митрополит Сурожский Антоний (Блум). Пасха
Митрополит Сурожский Антоний (Блум). О радости Христовой
Синаксарь во святую и великую неделю Пасхи